Alþjóðlegt orgelsumar, hinir vinsælu sumartónleikar í Hallgrímskirkju, standa frá 18. júní til 21. ágúst þetta árið. Einu sinni í viku heldur kammerkórinn frábæri, Schola cantorum, tónleika í hádeginu. Þrisvar í viku má njóta þess að hlusta á hæfileikaríka organista, suma á heimsmælikvarða, leika á hið magnaða Klais-orgel kirkjunnar. Organistarnir eru bæði íslenskir og erlendir, en erlendu gestirnir þetta árið eru frá Bandaríkjunum, Svíþjóð, Hollandi, Bretlandi, Frakklandi, Lettlandi og Þýskalandi.
Leo van Doeselaar, organisti við Royal Concertgebouw í Amsterdam og Martinikirkjuna í Groningen, er meðal eftirsóttustu orgelleikara Hollands. Hann lauk einleikaraprófi á orgel og píanó frá Tónlistarháskólanum í Amsterdam þar sem hann hlaut verðlaun fyrir framúrskarandi orgelleik. Hann sérhæfði sig í franskri orgeltónlist undir leiðsögn André Isoir. Hann hefur leikið inn á fjölda geisladiska og spanna útgáfur hans allt frá klassískum verkum í fjórhentum orgelútgáfum með Wyneke Jordans til leiks hans á sögufræg orgel.
Leo leikur með barokkhljómsveitinni Nederlands Bach Society og er einn af þátttakendum í háttskrifuðu myndbands- og upptökuverkefni sem kallast All of Bach. Á tónleikum sínum hér leikur Leo meðal annars hið stórskemmtilega verk Lærisveinn galdrameistarans eftir Dukas ásamt sígildum verkum J.S. Bachs og C. Francks og nýlegum verkum eftir þýsk og hollensk tónskáld.