Jónas Sigurðsson stimplaði sig inn í íslenskt tónlistarlíf árið 2007 þegar hann gaf út sína fyrstu sólóplötu, Þar sem malbikið svífur mun ég dansa. Áður hafði hann þó vakið athygli landsmanna með hljómsveitinni Sólstrandargæjunum sem gerði það gott á tíunda áratugnum með slögurum sem enn lifa góðu lífi.
Önnur breiðskífa Jónasar kom út árið 2010 og ber nafnið Allt er eitthvað. Hana vann Jónas í samstarfi við hljómsveit sína Ritvélar framtíðarinnar, en saman hafa þau getið sér gott orð fyrir líflega og kröftuga sviðsframkomu og hafa komið fram víða síðustu ár. Lagið Hamingjan er hér er af þeirri plötu en það hlaut titilinn lag ársins á íslensku tónlistarverðlaununum árið 2011.
Í október 2012 gaf Jónas út sína þriðju plötu en hún var unnin í samstarfi við Lúðrasveit Þorlákshafnar og er þematengd plata. Þar leitar Jónas í upprunann sinn í sjávarþorpinu Þorlákshöfn og er efniviður sköpunarinnar hafið, fólkið sem býr við það og samfélagið sem það í býr til. Jónas og Lúðrasveit Þorlákshafnar héldu þrenna útgáfutónleika í Reiðhöllinni í Þorlákshöfn í október 2012 og fluttu svo plötuna aftur í heild sinni ásamt eldri lögum Jónasar á tvennum tónleikum í Fjarðarborg á Borgarfirði eystri í aðdraganda Bræðslunnar 2013.
Sumarið 2013 var Jónas einn af áhafnarmeðlimum Húna II og hélt 16 tónleika ásamt fríðu föruneyti í jafnmörgum höfnum þegar Húni II sigldi hringinn í kringum landið á þremur vikum og fengu landsmenn að fylgjast með því ævintýri í sjónvarpsþáttunum Áhöfnin á Húna.
Jónas er einnig í hljómsveitinni Dröngum ásamt Mugison og Ómari Guðjóns en samnefnd plata þeirra kom út í október 2013 og fylgdu þeir henni eftir með 30 tónleikum um allt land.
Þessa dagana er Jónas að vinna með leikhóp að uppsetningu á leikritinu Útlenski drengurinn sem frumsýnd verður 15. nóvember, en þar er tónlistin og hljóðheimurinn í höndum Jónasar.
