Sunnudaginn 30. nóvember kl. 20 kemur Strengjakvartettinn Siggi fram á tónleikum tónleikaraðarinnar Hljóðön í Hafnarborg. Á efnisskrá eru verk eftir Giacinto Scelsi, Naomi Pinnock, Atla Heimi Sveinsson og Unu Sveinbjarnardóttur þar sem kvartettforminu er velt fyrir sér og sameining hljóðfæranna fjögurra í einn hljóðheim eru hugleidd.
Strengjakvartettinn Siggi kom fyrst fram á tónleikum samnorrænu tónlistarhátíðarinnar UNM sem haldin var árið 2012. Þar strauk kvartettinn strengi, jafnt sem statíf og hljóðfærabúka við góðan orðstír. Hópurinn er skipaður Unu Sveinbjarnardóttur og Helgu Þóru Björgvinsdóttur, fiðluleikurum, Þórunni Ósk Marínósdóttur, víóluleikara og Sigurði Bjarka Gunnarssyni, sellóleikara.
Hljóðön er tónleikaröð tileinkuð tónlist 20. og 21. aldar þar sem hugmyndaauðgi og listræn glíma tónskálda leiða áheyrendur inn á áður ókunnar slóðir. Nafn tónleikaraðarinnar skírskotar til smæstu merkingargreinandi hljóðeiningar í hljóðkerfi tungumála, grunneiningar sem púsla má ólíkt saman svo úr verði tilraun til merkingar. Hafnarborg efnir hér til tónleikaraðar þar sem ætlunin er að kynna ólík verk samtímatónskálda úr fremstu röð. Í forgrunni verða verk sem fá best notið sín við þær aðstæður og miklu nánd sem býðst í sal Hafnarborgar og telja má sérstakan í flóru tónlistarsala á höfuðborgarsvæðinu. Tónleikaröðin er styrkt af tónlistarsjóði mennta- og menningarmálaráðuneytis og tónlistarsjóði Ernst von Siemens. Listrænn stjórnandi Hljóðanar er Þráinn Hjálmarsson.