Paul Lewis telst til fremstu píanóleikara sinnar kynslóðar. Hann kemur reglulega fram í mörgum af virtustu tónlistarhúsum heims, ýmist einn eða sem einleikari ásamt hljómsveitum og kammerhópum. Paul Lewis vakti fyrst verulega athygli á alþjóðlegum vettvangi með flutningi sínum á öllum píanósónötum Beethovens, bæði á tónleikum og á hljóðupptökum Harmonia Mundi útgáfufyrirtækisins, en undanfarin tvö ár hefur hann einbeitt sér að tónverkum Schuberts og þá aðallega píanóverkum frá síðasta æviskeiði tónskáldsins. Verkefnið hefur leitt hann um víða veröld, t.d. til New York, Chicago, Tókýó, Melbourne, Rotterdam, Bologna, Flórens, London, Oxford, Bristol og Perth. Velgengnin hefur verið slík að þrjár síðustu píanósónötur Schuberts, leikur hann í vetur á a.m.k. fjörutíu og fimm tónleikum um allan heim.
Paul Lewis stundaði nám hjá Ryszard Bakst við Chethams tónlistarskólann og hjá Joan Havill við Guildhall School of Music and Drama í Lundúnum og sótti einkatíma hjá meistara Alfred Brendel. Hann er listrænn stjórnandi Midsummer Music kammermúsíkhátíðarinnar ásamt eiginkonu sinni, Björgu Lewis sellóleikara frá Noregi, en hátíðin er haldin á hverju ári í Buckinghamskíri í Bretlandi.