Alþjóðlegt orgelsumar, hinir vinsælu sumartónleikar í Hallgrímskirkju, standa frá 18. júní til 21. ágúst þetta árið. Einu sinni í viku heldur kammerkórinn frábæri, Schola cantorum, tónleika í hádeginu. Þrisvar í viku má njóta þess að hlusta á hæfileikaríka organista, suma á heimsmælikvarða, leika á hið magnaða Klais-orgel kirkjunnar. Organistarnir eru bæði íslenskir og erlendir, en erlendu gestirnir þetta árið eru frá Bandaríkjunum, Svíþjóð, Hollandi, Bretlandi, Frakklandi, Lettlandi og Þýskalandi.
Bandaríski organistinn Douglas Cleveland ólst upp í borginni Olympia í Washington og lærði við Eastman School of Music og Háskólana í Indiana og Oxford. Hann öðlaðist alþjóðlega viðurkenningu árið 1994 þegar hann hlaut fyrstu verðlaun American Guild of Organists fyrir unga orgelleikara og hefur síðan þá leikið í 49 fylkjum Bandaríkjanna ásamt frægustu kirkjum og tónleikasölum í Evrópu, Ástralíu, Singapore og Japan.
Douglas hefur auk þess átt farsælan kennsluferil, gefið út fjórar geislaplötur við lof gagnrýnenda og leikið með bæði sinfóníuhljómsveitum og snemmtónlistarhópum. Þetta er í þriðja sinn sem Dogulas heimsækir Klais-orgelið en hann mun leika spennandi blöndu af gamalli og nýrri orgeltónlist sem spannar allt frá Bach og Marchand til bandarískra samtímatónskálda.