Alþjóðlegt orgelsumar, hinir vinsælu sumartónleikar í Hallgrímskirkju, standa frá 18. júní til 21. ágúst þetta árið. Einu sinni í viku heldur kammerkórinn frábæri, Schola cantorum, tónleika í hádeginu. Þrisvar í viku má njóta þess að hlusta á hæfileikaríka organista, suma á heimsmælikvarða, leika á hið magnaða Klais-orgel kirkjunnar. Organistarnir eru bæði íslenskir og erlendir, en erlendu gestirnir þetta árið eru frá Bandaríkjunum, Svíþjóð, Hollandi, Bretlandi, Frakklandi, Lettlandi og Þýskalandi.
Ligita Sneibe er lettnesk en búsett í Svíþjóð þar sem hún starfar bæði sem konsert- og kirkjuorganisti. Hún lærði orgelleik við Lettneska tónlistarháskólann og Tónlistarháskólann í Piteå í Svíþjóð og hefur sinnt kennslu í báðum löndum. Hún hefur unnið til verðlauna fyrir leik sinn, meðal annars fyrir túlkun sína á verkum Messiaens, og ferðast um Evrópu og Japan og haldið tónleika.
Ligita hefur verið iðin við að flytja verk eftir Lettnesk samtímatónskáld og munum við njóta nokkurra þeirra á tónleikum hennar ásamt sænskri orgelmúsík og sígildum verkum eftir þá Bach og Messiaën.