Í hæfileika- og tónlistarkeppninni Jaðarber Got hæfileikar stíga hæfileikabúntin Tinna Þorsteinsdóttir, Grímur Helgason og Kristín Þóra Haraldsdóttir á stokk og etja kappi hvert við annað. Keppt verður í mismunandi liðum og munu keppendur spreyta sig á ólíkum tjáningarleiðum tónlistar, allt frá hæfni til að galdra fram viðkvæmnisleg sóló til krassandi samleiks, eða með því töfra fram heillandi ábreiðu á dægurlagi.
Sá besti eða sú besta mun klárlega vinna; hvert þeirra er besti heildstæði tónlistarmaðurinn? Dómarar eru ekki af verri endanum enda allt þungavigtarmenn á sviði tónlistar: Atli Ingólfsson, Halla Oddný Magnúsdóttir og Elísabet Indra Ragnarsdóttir. Einnig getur þú lesandi góður haft áhrif á niðurstöðu keppninnar með því að mæta í Mengi þann 22. maí.
Kynnir er hinn atorkusami Guðmundur Felixson.