Atlantic Piano Duo
Dr. Kristín Jónína Taylor & Dr. Bryan Stanley
EFNISSKRÁ
“Four Sea Interludes” úr Peter Grimes eftir Benjamin Britten (1913-1976)
1. Dawn – Lento e tranquillo
2. Sunday Morning – Allegro spiritoso
3. Moonlight – Andante comodo e rubato
4. Storm – Presto con fuoco
Pianoforte Suite–soggetto cavato dalle vocali e consonanti di KJT eftir Dr. Bryan Stanley
Dr. Kristín Jónína Taylor, píanó
Pláneturnar eftir Gustav Holst (1874-1934)
1. Mars, herguðinn
2. Venus, friðflytjandinn
3. Merkúr, vængjaði sendiboðinn
4. Júpíter, boðberi gleðinnar
5. Satúrnus, ellin
6. Úranus, töframaðurinn
7. Neptúnus, dulhyggjan
Dr. Kristín Jónína Taylor (f. 1976) er íslensk-bandarískur píanóleikari sem vakið hefur athygli fyrir flutning sinn á norrænum píanóverkum, t.d. frumflutning í Bandaríkjunum á píanókonserti Jóns Nordal árið 2003. Hún hefur komið víða fram á tónleikum, bæði í Bandaríkjunum, en einnig á Íslandi, í Frakklandi, Tékklandi, Belgíu, Svíþjóð, Austurríki og Serbíu.
Kristín Jónína sótti tíma hjá Halldóri Haraldssyni þegar hún var sextán ára skiptinemi á Ísland, en píanónám sitt stundaði hún við tónlistarháskóla University of Missouri-Kansas City. Hún hlaut svo doktorsgráðu frá University of Cincinnati College-Conservatory of Music, en doktorsrannsókn hennar fjallaði um píanókonsert Jóns Nordal. Kristín Jónína hefur einnig rannsakað tónlist Þorkels Sigurbjörnssonar, fyrsti geisladiskurinn sem kom út með leik hennar var helgaður píanóverkum Þorkels og gefinn út af Íslenskri tónverkamiðstöð árið 2010. Tónlist Þorkels var einnig allsráðandi á þriðja geisladisk Kristínar Jónínu sem Smekkleysa gaf út í fyrra og bar yfirskriftina Thorkell Sigurbjörnsson: Short Stories for Flute and Piano.
Dr. Bryan Stanley (f. 1972), píanóleikar og tónskáld, hefur hlotið viðurkenningar og verðlaun fyrir tónlist sína sem útgáfufyrirtækin Hal Leonard, Boosey & Hawkes og G. Schirmer hafa gefið út. Meðal verka hans má nefna útsetningar á Appalachian Spring fyrir fiðlu/píanó og einleikspíanó eftir Aaron Copland, auk útsetninga á bandarískum þjóðlögum fyrir einsöngvara. Tónlist Bryans hefur verið flutt af hljómsveitum víða um Bandaríkin, en auk þess að sinna tónsmíðum kemur hann reglulega fram á tónleikum, einn og með öðrum, auk þess sem hann kennir og heldur fyrirlestra.
Atlantic Piano Duo tvíeykið heldur nú í sína fyrstu tónleikaferð, þar sem fjórhent píanótónlist og tónlist fyrir tvö píanó er í forgrunni.
Á tónleikum sínum í Hörpu leikur dúóið tvö hljómsveitarverk eftir bresk tónskáld. Four Sea Interludes eftir Benjamin Britten, útsett fyrir píanódúó, fannst í óperu tónskáldsins, Peter Grimes, en þar vekur tónlistin upp hinar ýmsu sjávarmyndir. Hin vinsæla og magnaða hljómsveitarsvíta Holsts, Pláneturnar, var upprunalega skrifuð fyrir tvö píanó, ef frá er talinn Neptúnus. Pianoforte Suite–soggetto cavato dalle vocali e consonanti di KJT er nýtt verk eftir Dr. Stanley, en verkið tileinkar hann unnustu sinni og félaga í Atlantic Piano Duo.