Rómeó og Júlía
Ástir og örlög eru í brennidepli á þessari óvenjulegu og spennandi efnisskrá. Tsjajkovskíj byggði eitt frægasta tónverk sitt á Rómeó og Júlíu Shakespeares, og hér víkur spennuþrungið andrúmsloftið á stundum fyrir ástleitnum stefjum elskendanna. Tónaljóðið Francesca di Rimini er byggt á sögu úr Gleðileiknum guðdómlega eftir Dante, um hefðarfrú sem fellir ástarhug til bróður eiginmanns síns, en hann myrðir þau bæði þegar allt kemst upp.
Í söngleiknum West Side Story var sagan af Rómeó og Júlíu uppfærð og látin gerast í New York þar sem tvær klíkur innflytjenda berjast um yfirráð á götum borgarinnar. Sinfónískir dansar úr West Side Story er glæsileg tónsmíð þar sem fléttað er saman helstu stefjum verksins, allt frá ljóðrænum hendingum Somewhere yfir í kraftmikla mambósveiflu. Porgy og Bess eftir Gershwin er annað meist- araverk bandarískrar tónlistar. Í litríkri sinfónískri útsetningu öðlast lögin nýtt líf, til dæmis smellir á borð við Summertime og It Ain't Necessarily So. Ástir og örlög á vorkvöldi í Eldborg.
Rico Saccani var aðalstjórnandi SÍ á árunum 1998–2002 og snýr nú aftur í fyrsta sinn um langt skeið.
