Kammerkór Mosfellsbæjar efnir til tónleika í tilefni af útgáfu disksins Mitt er þitt, sem hefur að geyma fjölbreytt efni allt frá endurreisnartímanum og fram til okkar daga. Þar á meðal má nefna lög eftir Gunnar Reyni Sveinsson, John Speight, Sigur Rós, Paco Peña og nokkur endurreisnartónskáld frá Spáni og Ítalíu.
Flest eru þessi lög annað hvort að koma út í fyrsta sinn eða í nýjum útsetningum sem ekki hafa heyrst áður.
Stjórnandi kórsins er Símon H. Ívarsson gítarleikari, en með kórnum leika á tónleikunum þeir Guðni Franzson á klarinett, Ívar Símonarson á gítar og Reynir Sigurðsson á víbrafón.
Kammerkór Mosfellsbæjar er metnaðarfullur áhugamannakór, sem hefur starfað í tólf ár og gefur nú út sinn fyrsta hljómdisk.