Kristjana Stefáns og Svavar Knútur á Græna Hattinum

Söngparið Svavar Knútur og Kristjana Stefáns sækja höfuðstað Norðurlands heim 20.september nk. og stefna að því að gleðja kaupstaðarbúa með dásamlegum dúettatónleikum. Kristjana og Svavar Knútur hafa vakið verðskuldaða athygli fyrir stórskemmtileg dúettakvöld, þar sem þau láta gamminn geysa og taka saman fjölbreytta dagskrá dúetta, sem rúmar allt frá Abba til Dolly Parton með viðkomu hjá Nick Cave og Páli Ísólfssyni, auk frumsamdra laga og hinna ýmsu gleði- og tregabomba. Kántrý, Evróvisjónpoppsmellir, blágresi og íslensk sígræn skólaljóð eru í fyrirrúmi.

Kristjana og Svavar hafa síðan 2008 haft unun af því að syngja saman dúetta og komið fram víða um landið við gríðargóðar undirtektir. Best er að tryggja sér miða í tíma. Forsala aðgöngumiða er á midi.is. Tónleikarnir hefjast kl. 21 og verður kósýkvöldsstemmningin allsráðandi.

Kristjana Stefánsdóttir hefur fyrir löngu skipað sér sess sem ein ástsælasta söngkona landsins og drottning íslenska djassins. Hún hefur gefið út fjölda hljómplatna bæði með sígildum djasslögum, blúslögum og eigin tónsmíðum í samstarfi við marga af færustu tónlistarmönnum Íslands. Hún hefur líka starfað farsællega sem tónlistarstjóri og tónskáld í Borgarleikhúsinu m.a. í hinum stórvinsælu leikritum Dauðasyndunum sjö, Jesús litla og Galdrakarlinum í Oz.

Svavar Knútur hefur undanfarin ár notið ört vaxandi velgengni sem söngvaskáld og tónlistarmaður. Hljómplötur hans, Kvöldaka, Amma og Ölduslóð hafa allar notið mikilla vinsælda og hlotið prýðilega dóma. Svavar Knútur hlaut í vor verðlaun úr minningarsjóði Önnu Pálínu Árnadóttur fyrir starf sitt í þágu eflingar þjóðlagatónlistar á Íslandi. Hann hefur einnig gert víðreist undanfarið og meðal annars ferðast með tónlist sína til Ástralíu, Evrópu, Bandaríkjanna og Kanada.

Hljómsveitin Gullfoss kemur loksins til Akureyrar og heiðra í þetta sinn Creedence Clearwater Revival með að leika öll þeirra bestu og vinsælustu lög, og af nógu er að taka.

Bad moon rising, Down on the corner, Long as I can see the light, Have you ever seen the rain, Fortunate son, Hey tonight, Who´ll stop the rain ofl. ofl.stórkostlegir hittarar.

Og bandið skipa engir aukvissar, Birgir Haraldsson söngur, Sigurgeir Sigmundsson gítar Ingimundur Óskarsson bassi,Sigfús Óttarsson trommur og Snorri Snorrason píanó og Hammond orgel.

Þau eru saman komin aftur, eftir að hafa flutt prógram með bestu lögum Eric Clapton fyrir 12 árum síðan víðsvegar um landið. Páll Rósinkranz söngvari, Matthías Stefánsson gítarleikari, Ingvi R. Ingvason trommari, Birgir Kárason bassaleikari, Jóhann Ingvason hljómborðsleikari, Alma Rut Kr og Ágústa Ósk sem radda og Gunnar Sigurðsson hljóðmaður koma fram á Græna Hattinum 12.október með nýtt program. Þarna verða flutt lög eins og Wonderful Tonight, Layla, Old Love, Tore Down, Everyday I Have the Blues, Change the World og mörg fleiri.

SúEllen heimsækir nú höfuðstað Norðurlands og ætlar að kynna nýja diskinn á Græna hattinum og spila sín þekktustu lög. Mikil eftirvænting er í hljómsveitarmeðlimum enda langt síðan hljómsveitin hefur spilað á Akureyri. Diskurinn heitir „Fram til fortíðar“ og var plata vikunnar á Rás 2 vikuna 11.-18. ágúst og fékk einkunnina 8,35 hjá Andreu Jónsdóttur og 4 stjörnur í nýlegum dómi. Hljómsveitin átti sitt blómaskeið frá 1987-1994 er hún lagðist í dvala. Þekktust eru lögin Símon er lasinn, sem fór í 1. sæti vinsældarlista Rásar 2 (1987), Elísa (1988), Kona (1991), Ferð án enda (1992) og Þessi nótt (1993)

SúEllen eru:
Guðmundur R. Gíslason: Söngur og umsýsla
Steinar Gunnarsson: Bassi, söngur og raddir
Jóhann Geir Árnason: Trommur og ásláttur
Ingvar Lundberg: Píanó og hljómborð
Bjarni H. Kristjánsson: Gítar, söngur og raddir

Á aðventunni mun Caritas á Íslandi (hjálparstofnun kaþólsku kirkjunnar) halda sína árlegu styrktartónleika, að þessu sinni til að styrkja geðheilbrigði og taka þátt í átakssöfnun fyrir geðgjörgæsludeild Landspítalans fyrir  bráðveikasta fólkið; “Á allra vörum –Þerrum tárin” .

Mörg okkar eru haldin fordómum gagnvart geðsjúkdómum. Geðsjúkdómar geta lagst á alla og enginn veit hver verður næstur. Við megum ekki láta okkar hlut eftir liggja . Við njótum svo margs í lífinu vegna örlætis og gjafmildi fólks sem hefur verið reiðubúið að láta gott af sér leiða. Hvar værum við stödd án þess?  Það er því ómæld ánægja fyrir Caritas að beina sínum  árlegu styrktartónleikum til að styrkja þetta þarfa málefni. Vertu með á styrktartónleikum Caritas og legðu lið góðu málefni. Þátttaka þín er mikil hjálp við málefnið og tónleikarnir, sem vert er að njóta. Fyrir málefnið er hvert eitt skref  mikilvægt og sérhver áfangi fram á við skiptir miklu máli.

Styrktartónleikar Caritas Þerrum tárin verða sunnudaginn 24 nóvember  kl 16:00 í  Kristskirkju við Landakot.  Meðal þeirra sem koma fram er úrvalslistafólkið Kristján Jóhannsson, tenór,  Elsa Waage, sópran, Guðný Guðmundsdóttir, fiðla, Svavar Bernharðsdóttir, víóla , Antonia Hevesi, orgel og Hamrahlíðakórinn undir stjórn Þorgerðar Ingólfsdóttur.

Tónleikar Caritas marka upphaf aðventunnar fyrir marga og fjölmargir gestir koma ár eftir ár á þessa eftirsóttu tónleika , njóta fagurra list og leggja góðu málefni lið. Efnisskrá tónleikanna verður glæsileg og fluttar verða skærustu perlur tónbókmenntanna.

Rómaðir virtúósar, Remus Azoitei and Eduard Stan, hefja rúmenska menningardaga í Reykjavík með tónleikum til heiðurs Enescu og Fauré

Tónleikar með tveimur af fremstu túlkendum tónlistar rúmenska tónskáldsins George Enescu, marka upphaf umfangsmikillar, tíu daga kynningar á rúmenskri menningu; kvikmyndum, bókmenntum, tónlist, sögu, mat og víni. Tónleikarnir varpa ennfremur ljósi á tengsl Enescus og lærimeistara hans, franska tónskáldsins Gabriels Fauré.

Fiðluleikarinn Remus Azoitei hefur komið fram sem einleikari með mörgum af fremstu hljómsveitum Evrópu, t.a.m. Fílharmóníusveit franska útvarpsins (Orchestre Philharmonique de Radio France), Þjóðarhljómsveit Belgíu (Orchestre National de Belgique) og Þýsku kammersveitinni (Deutsche Kammer Orchester). Hann hefur jafnframt leikið í virtum tónleikahúsum víða um heim, t.d. Carnegie Hall og Alice Tully Hall í Lincoln Centre í New York, Concertgebouw í Amsterdam og Wigmore Hall í London.  Í tónlistartímaritinu The Strad var honum líst sem “óheftum snillingi með ríka andagift og mikilfenglega tækni”.  Azoitei er prófessor við Konunglegu tónlistarakademíuna í London og listrænn stjórnandi Enescu Society á Englandi.

Píanóleikarinn Eduard Stan hefur komið fram í mörgum af virtustu tónleikasölum heims og má þar nefna Carnegie Hall í New York, Konzerthaus og Philharmonie í Berlín og Concertgebouw í Amsterdam. Í Frankfurter Allgemeine Zeitung dagblaðinu var píanóleikur hans rómaður fyrir ríka tilfinningu fyrir margbreytilegum tón- og litbrigðum. Eduard Stan og Remus Azoitei hljóðrituðu öll verk Enescus fyrir fiðlu og píanó, en það hafði ekki áður verið gert. Hänssler Classic útgáfufyrirtækið gaf safnið út, en fyrirtækið hefur einnig gefið út hljóðritanir Eduards Stan á píanóverkum ýmissa tónskálda, allt frá Bach til Debussy.

Efnisskrá:
G. Fauré – Fiðlusónata í A-dúr op. 13
G. Enescu – Sónata nr. 3 í a-moll op. 25 “Í rúmenskum, þjóðlegum stíl”

Í þriðju sónötu sinni fyrir píanó og fiðlu teflir George Enescu saman á einstakan hátt einkennum rúmenskrar þjóðlagatónlistar og áhrifum úr ungverskum og slavneskum menningarheimum sem og Gyðingatónlist.

Franska tónskáldið Gabriel Fauré var kennari Enescus og hafði mikil áhrif á hann. Fiðlusónata Faurés markaði nýtt upphaf fyrir tónlist sem skrifuð var fyrir fiðlu og píanó. Eins og kennari Faurés, Camille Saint-Saëns, lýsti þá kom sónatan fram með “ný form, spennandi tóntegundaskipti, óvenjuleg litbrigði og óvænt hrynmynstur”.

Kór Keflavíkurkirkju mun flytja valin lög úr hinum þekkta söngleik Jesus Christ Superstar í Akureyrarkirkju laugardaginn 5. október kl. 15:00  en færri komust að en vildu þegar hann var fluttur í kirkjum á Suðurnesjum sl. vor.

Að þessu sinni verða jafnframt fluttar nokkrar af perlum hljómsveitarinnar U2 sem kórinn hefur áður flutt við góðar undirtektir. Kristján Jóhannsson flytur hugleiðingu milli laga

Arnór B. Vilbergsson organisti stendur í stafni og stjórnar kór, hljómsveit og einsöngvurum sem eru ekki af verri endanum. Má þar nefna Eyþór Inga Gunnlaugsson en hann mun syngja hlutverk Jesú og Sigurð Ingimarsson sem verður í hlutverki Júdasar. Aðrir söngvarar eru úr röðum kórfélaga og margir þeirra munu jafnframt leika á ýmiss hljóðfæri.

Söngvarar auk Eyþórs og Sigurðar eru Birna Rúnarsdóttir,Sveinn Sveinsson, Elmar Þór Hauksson, Birta Rós Sigurjónsdóttir og Sólmundur Friðriksson ásamt fleirum.

Hljómsveit skipa:
Vignir Bergmann gítar
Aðalsteinn Axelsson gítar
Jón Árni Benediktsson bassi
Þórhallur Arnar Vilbergsson trommur
Arnór B. Vilbergsson hammond og píanó

Sinfóníuhjómsveit Íslands
Fimmta Beethovens

Fimmta sinfónía Beethovens er eitt vinsælasta verk tónbókmenntanna og ná vinsældir þess langt út fyrir raðir aðdáenda klassískrar tónlistar. Viðurnefnið Örlagasinfónía hefur fest við verkið en það er einkum skírskotun til heyrnarleysis tónskáldsins sem var farið að hrjá hann í sköpunarferli verksins.

Nýtt ónefnt verk Daníels Bjarnasonar er annað verkið sem Los Angeles Fílharmóníuhljómsveitin pantar af honum og verður það frumflutt í Walt Disney höllinni í desember næstkomandi undir stjórn Gustavos Dudamel.

Eldfuglinn er fyrsta sagan sem Stravinskíj færði í tóna fyrir Rússneska ballettinn í París. Í kjölfarið fylgdu ballettarnir Petrúska og Vorblótið. Glæsileg svíta Stravinskíjs úr Eldfuglinum endurspeglar ævintýrið um fuglinn glóandi sem bæði fylgir blessun og bölvun.

Ævintýrið um Shéhérazade úr Þúsund og einni nótt hefur verið mörgu tónskáldinu hugleikið. Ravel samdi töfrandi tónsmíð við þrjú ljóð um stúlkuna hugrökku sem spennandi verður að heyra í flutningi áströlsku sópransöngkonunnar Allison Bell. Hún hefur sungið helstu hlutverk óperubókmenntanna sem skrifuð hafa verið fyrir háan sópran og er tíður gestur í helstu tónleikasölum heims.

Daníel Bjarnason
Nýtt verk
Ígor Stravinskíj
Eldfuglinn-svíta
Maurice Ravel
Shéhérazade
Ludwig van Beethoven
Sinfónía nr. 5
Ilan Volkov
hljómsveitarstjóri
Allison Bell
einsöngvari

Sinfóníuhjómsveit Íslands
Kvöldstund með Mozart

Brunnur snilldarverka Mozarts er nær ótæmandi. Hrífandi flautukonsert hans einkennist af yfirlætislausum þokka og tækifærum einleikarans til að sýna snilli sína umbúðarlaust. Tilhlökkunarefni verður að heyra konsertinn í flutningi Hallfríðar Ólafsdóttur, fyrsta flautuleikara Sinfóníuhljómsveitar Íslands, en Hallfríður hefur til margra ára verið leiðandi afl í íslensku tónlistarlífi.

Sterkur persónulegur stíll er ríkjandi í danstónlist Mozarts. Balletttónlistin úr Idomeneo er þar engin undantekning þar sem fimm fjölbreyttir þættir balletttónlistarinnar mynda órofaheild í ætt við óperuforleik eða sinfóníu. Sinfónía nr. 36 markaði nýtt upphaf magnaðra sinfónískra skrifa hjá Mozart. Hann samdi þessa ástsælu sinfóníu á aðeins fjórum dögum árið 1783 í góðu yfirlæti hjá Thun greifa í Linz. Maurerische Trauermusik er þekktasta frímúraratónlist Mozarts sem sjálfur var reglubróðir. Tónlistin er alvarleg og dramatísk í ætt við Sálumessu tónskáldsins.

Það er við hæfi að á þessum Mozart- tónleikum stjórni breski hljómsveitarstjórinn Leo Hussain, tónlistarstjóri Landestheater í Salzburg, fæðingarbæ Mozarts. Hussain hefur á síðustu árum verið eftirsóttur stjórnandi bæði í óperu- og hljómsveitargeiranum.

Wolfgang Amadeus Mozart 
Balletttónlist úr Idomeneo
Flautukonsert nr. 1 
Maurerische Trauermusik
Sinfónía nr. 36, Linz
Leo Hussain
hljómsveitarstjóri
Hallfríður Ólafsdóttir
einleikari

Einn ástsælasti söngvari þjóðarinnar, Pálmi Gunnarsson, heldur tónleika í Menningarhúsinu Hofi 8. nóvember þar sem hann fer yfir langan feril ásamt einvalaliði tónlistarmanna. Hvers vegna varstu ekki kyrr, Þorparinn, Ég er á leiðinni, Íslenska konan, Vegurinn heim, Þitt fyrsta bros, Ísland er land þitt og allar hinar perlurnar sem Pálmi hefur gætt lífi og sál verða á efniskrá tónleikana.

Ekki missa af þessum einstöku tónleikum með Pálma og gestum.

Tónlistarstjóri: Þórir Úlfarsson 
Söngur: Pálmi Gunnarsson
Sérstakir gestir: Magnús Eiríksson & Ellen Kristjánsdóttir

Nýútkominn diskur tríós Sunnu Gunnlaugs, 'Distilled' fær nú hverja glimrandi umfjöllun á fætur annari erlendis. Jazzgagnrýnandi Rhapsody valdi 'Distilled' sem einn af top 10 diskum september mánaðar. Diskurinn fékk einnig nýlega umfjöllun hjá London Jazz News sem segir Sunnu vera "sérlega smekklegan píanista" og diskinn vera "ferskan og óaðfinnanlega fram settan af þéttu tríói, stútfullu af hugmyndum". Jazznytt í Noregi mælir með disknum í nýjasta tölublaði sínu og Jazz Japan gefur honum einnig frábæra dóma og segir "stemmningu diskins ná hæðum sem einungis topp-tónlist nær."

Tríóið fagnar nú útkomu disksins með tvennum tónleikum í Hannesarholti 26 og 27 september.

Sunna Gunnlaugs-píanó
Þorgrímur Jónsson-bassi
Scott McLemore-trommur

Tríó Sunnu Gunnlaugs  í Hofi 2. október!

Nýútkominn diskur tríós Sunnu Gunnlaugs, 'Distilled' fær nú hverja glimrandi umfjöllun á fætur annari erlendis.

Jazzgagnrýnandi Rhapsody valdi 'Distilled' sem einn af top 10 diskum september mánaðar. Diskurinn fékk einnig nýlega umfjöllun hjá London Jazz News sem segir Sunnu vera "sérlega smekklegan píanista" og diskinn vera "ferskan og óaðfinnanlega fram settan af þéttu tríói, stútfullu af hugmyndum". Jazznytt í Noregi mælir með disknum í nýjasta tölublaði sínu og Jazz Japan gefur honum einnig frábæra dóma og segir "stemmningu diskins ná hæðum sem einungis topp-tónlist nær." Tríóið fagnar nú útkomu disksins með tónleikum víða um land. Þau verða í Hofi 2 október og hefjast tónleikarnir kl 20:00. Miðaverð er 2000 krónur.

Sunna Gunnlaugs-píanó
Þorgrímur Jónsson-bassi
Scott McLemore-trommur

Hinir árlegu jólatónleikar Borgardætraá Rósenberg.

Með dætrunum leikur tríóið þorpsbúar.

Eyþór Gunnarsson á píanó, Birgir Bragason á kontrabassa og Magnús Trygvason Eliassen á trommur.

Á efnisskrá eru jólalög úr ýmsum áttum, gamanmál og almenn skemmtilegheit.

Tónleikarnir hefjast kl. 21 öll kvöldin.

Borðapantanir á Rósenberg

Á hverju ári greinast 10-14 börn með gigtarsjúkdóm og sum greinast með alvarlega gigt. Hér á landi eru því um eða yfir 200 börn á aldrinum 0 -18 ára með einhvers konar gigt.

Nú er búið er að stofna styrktarsjóð fyrir gigtveik börn og fjölskyldur þeirra. Markmið styrktarsjóðsins er að bæta lífsgæði þessara barna og fjölskyldna þeirra. Þann 22. október nk. verða haldnir tónleikar til styrktar gigtveikum börnum og mun ágóðinn renna í styrktarsjóðinn.

Á tónleikunum munu koma fram Páll Óskar, Jón Jónsson, Friðrik Dór, Gói,Dikta, Ef lífið væri söngleikur, Erna Hrönn, Védís Hervör, Jóhanna Guðrún og Davíð.

Jóhannes Haukur verður kynnir kvöldsins.

Miðaverð:
3.000 kr
1.500 kr fyrir 12 ára og yngri (ath að versla þarf þá miða í verslunum Brim, Laugavegi eða Kringlunni)

Harpa kynnir í samstarfi við Stomp Productions og Glynis Henderson Productions:

STOMP stórkostleg bresk sýning sem hefur farið sigurför um heiminn. Nú verður STOMP sett á svið í Eldborgarsal Hörpu ferskara, hraðara og fyndnara en nokkru sinni fyrr.

Núna er tækifærið ef  þú hefur aldrei séð þessa heimsfrægu sýningu sem hefur hrifið áhorfendur um heim allan. STOMP sameinar leikhús, dans og hryntónlist en átta flytjendur notast við stígvél, ruslafötur, sópa , vaska og margt fleira til að búa til stórkostlegan takt sem hrifið hefur áhorfendur um heim allan.

Nú blása Blikar til veislu í Smáranum og halda alvöru Kópavogsball. H
átíðarkvöldverður,skemmtiatriði og risadansleikur með engum öðrum en Páli Óskari og Buffinu fram á rauða nótt! Við kynnum einnig til leiks Blikann, uppskerubjórinn 2013!

Mikilvægt að mæta snemma því að Páll Óskar byrjar á slaginu 22:00. Mætum öll í Smárann og skemmtum okkur saman. Miðaverð á kvöldverð og skemmtiatriði er haldið í lágmarki og er 4.900 en einnig er hægt að kaupa bara miða á ballið með sem byrjar klukkan 22:00 þegar að Páll Óskar stígur á svið.

Miðasala á ballið verður í hurðinni frá klukkan 21:30 í Smáranum í Kópavogi en miðasala á allt kvöldið verður líka í Smáranum og að sjálfsögðu hér á miði.is

Tríó Cracovia
Tríó „Cracovia“ var stofnað árið 1996 af þrem vinum, fiðluleikaranum Krzystkof Smietana, sellóleikaranum Julian Tryczynski og píanóleikaranum Jerzy Jacek Tosik-Warszawiak. Allir þeir eru fæddir í Kraká og hafa þar lokið háskólaprófi við Tónlistar Akademíuna. Þegar tríóið var stofnað bjuggu þeir í sitt hvoru landinu, Krzystkof Smietana í London þar sem hann starfaði sem prófesor í Guildhall School of Music and Drama, Julian Tryczynski bjó í Winchester í Bandaríkjunum og starfaði sem prófessor í Háskóla þar en Jacek Tosik - Warszawiak bjó á Íslandi þar sem hann starfaði í Tónlistarskóla Borgarnes.

Hugmynd að stofnun tríósins var að feta í fótspor „Tríó Kraków“ sem var þekkt í Póllandi á sjötta og sjöunda áratug síðust aldar. Tilraunin gekk vel og kom Tríóið fram á sínum fyrstu tónleikum árið 1997. Tríóið hefur haldið fjölda tónleika m.a. í Póllandi, Englandi, Þýskalandi, Kanada og á Íslandi auk þess að hafa tekið þátt í tónlistarhátíðum víða um heim. Í maí 2001 lék tríóið á tónleikum með Sinfóníuhljómsveit Norðurlands í Glerárkirkju.

Tríó „Cracovia“ hefur gefið út alls 5 plötur með 13 tríóum frá klassik til nútímatónlistar
Á þessum tónleikum er nýr fiðluleikari að koma fram með tríóinu, Wieslaw Kwasny, sem er prófessor í Tónlistar Akademíu í Kraków.

Einar Lövdahl sendi frá sér plötuna Tímar án ráðaí upphafi ágúst síðastliðins. Þann 11. október næstkomandi hyggst hann blása til útgáfutónleika í Tjarnarbíó þar sem öll lög plötunnar verða flutt.

Lög af plötunni hafa hljómað í útvarpi síðastliðið árið auk þess sem platan sjálf var „Plata vikunnar“ á Rás 2 vikuna 16.-20. september.

Einar Lövdahl er 22 ára tónlistarmaður úr Vesturbænum. Tímar án ráða er frumraun hans í plötuútgáfu. Á tónleikum er einvalalið hljóðfæraleikara, Hjörðin svokallaða, honum til halds og trausts.

Dagskrá tónleika:
Húsið opnar kl. 20:30
Tónleikar hefjast kl. 21:30

Upphitun verður í höndum tónlistarmannsins Auðuns.

Miðaverð er 1.500 kr. en hægt verður að kaupa miða og geisladisk á 2.500 kr.

(Þeir sem kaupa miða á netinu geta því keypt diskinn á niðursettu verði, 1.000 kr., gegn framvísun miða.)

Sálin hans Jóns míns fagnar í ár 25 ára afmæli. Af því tilefni stendur sveitin fyrir viðhafnartónleikum í Hörpu þann 9. nóvember. Verður þar mikið um dýrðir og ýmsu til tjaldað.

Tónleikadagskráin samanstendur af fjölmörgum af þekktustu lögum sveitarinnar í gegnum árin, auk nokkurra laga sem sjaldan heyrast. Af þessu tilefni verða Sálverjum til fulltingis ýmsir valinkunnir aðstoðarmenn.

Random Hero Festival 2013
Laugardagur 5. október kl. 20:00

Bam Margera býður í brúðkaupsveislu og tónleika til styrktar hjólabrettamenningu í Reykjavík.
Veislan verður haldin í Hafnarhúsinu þann 5. október næstkomandi og mun allt listafólk gefa framlag sitt til tónleikanna.

Fram koma:
Yelawolf
Fuckface Unstoppable
Kaleo
Sísí Ey
og fleiri.

Random Hero Festival er hugarfóstur Bam Margera atvinnu-hjólabrettakappa og ofurhuga sem best þekktur er úr Viva La Bam þáttunum og Jackass myndunum. Á tónleikunum sjálfum mun Bam Margera taka upp loka atriði í nýrri kvikmynd sem kallast "Let’s go to jail" og býður hörðum Jackass aðdáendum að vera með.

Allar fyrirspurnir má senda á randomherofestival@gmail.com