Langspil er fornt, íslenskt þjóðlagahljóðfæri sem hefur líklega borist til landsins frá Noregi, þó að mikið sé óljóst varðandi sögu þess. Hljóðfærið er talsvert sjaldgæf sjón í íslensku menningarlífi og telst því óvenjulegt að halda tónleika í fullri lengd þar sem langspilið er í aðalhlutverki.
Hildur Heimisdóttir (f. 1988) útskrifaðist árið 2012 með mastersgráðu í sellóleik frá Det Jyske Musikkonservatorium í Aarhus, og fjallaði lokaritgerð hennar um langspil og íslenska fiðlu. Júlía Traustadóttir (f. 1985) lærði lengi á fiðlu en sneri sér að mestu að söng árið 2005. Hún stundaði nám vð Royal College of Music í London, þaðan sem hún lauk bachelornámi árið 2011.
Samstarf Hildar og Júlíu hófst sumarið 2012 þegar þær léku tónlist á götum borgarinnar við mikla hrifningu ferðamanna og innfæddra. Tónleikarnir í Hörpu samanstanda af þjóðlögum af ýmsu tagi, bæði íslenskum og erlendum. Langspilið verður kynnt betur fyrir áheyrendum með litlum fyrirlestrabrotum á milli laga.
Tónleikarnir eru styrktir af Ýli – sjóði fyrir ungt tónlistarfólk