Meistarataktar
Sinfóníutónleikar á Myrkum músíkdögum Á tónleikum Sinfóníuhljómsveitar Íslands á Myrkum músíkdögum er jafnan að finna spennandi efnisskrá þar sem íslensk tónlist er í forgrunni.
Leifur Þórarinsson og Þorkell Sigurbjörnsson eru í hópi íslenskra tónskálda sem með afgerandi hætti settu svip sinn á íslenskt tónlistarlíf á ofanverðri 20. öld. Báðir voru þeir heimsborgarar og báru ferska strauma til landsins, ekki aðeins með tónsmíðum, heldur miðluðu þeir af þekkingu sinni með kennslu og í útvarpi.
Ymur Þorkels er frá árinu 1969, sama ári og Leifur samdi fiðlukonsertinn sem Einar Grétar Sveinbjörnsson frumflutti árið eftir. Sigrún Eðvaldsdóttir lék konsertinn með BBC hljómsveitinni í Glasgow 1992 og hljóðritaði hann síðan með Sinfóníuhljómsveit Íslands árið 1998. Hljómsveitarverkið Hnit er frá árinu 1991 en Árni Egilsson kontrabassaleikari frumflutti Nið árið 1975 undir stjórn Vladimirs Ashkenazy og var verkið tilnefnt til tónskáldaverðlauna Norðurlandaráðs 1980. Hilmar Þórðarson er af annarri kynslóð en „gömlu“ meistararnir og verður verk hans Lupus chorea frumflutt á tónleikunum.
Einleikararnir, Sigrún Eðvaldsdóttir og Hávarður Tryggvason eru, líkt og stjórnandinn Petri Sakari, meistarar í flutningi íslenskrar nútímatónlistar.