Tónleikar Unnar Birnu Bassadóttur á Græna Hattinum!
Það bíða margir spenntir eftir fyrstu sólóplötu Unnar Birnu Bassadóttur, en hún er væntanleg á komandi vetri. Á Græna hattinum mun Unnur flytja lög af þessari væntanlegu plötu, ásamt hljómsveit. Sum laganna verða frumflutt, en önnur hafa þegar heyrst í útvarpi, eins og lagið “Sober”, sem nú er á ferð um heiminn með Ian Andersson og Jethro Tull (sem upphitunarlag á skjá).
Unnur er fjölhæfur listamaður og hefur komið víða við, þrátt fyrir ungan aldur. Hún er fiðluleikari, söngkona og lagasmiður og er e.t.v. best þekkt sem fiðluleikari og söngkona Fjallabræðra. Hún hefur leikið með fjölda innlendra og erlendra tónlistarmanna og hefur einnig síðustu ár tekið þátt í ólíkum leiksýningum, s.s. Jeppa á fjalli og Spamalot.
Hljómsveitin er ekki af verri endanum, en það eru þeir Vignir Snær Vigfússon á gítar, Pálmi Sigurhjartarson á hljómborð, Róbert Þórhallsson á bassa, Ólafur Hólm Einarsson á trommur, Dagný Halla Björnsdóttir og Fabúla syngja raddir auk Marínu Óskar Þórólfsdóttur sem einnig spilar á flautu.
Áður en Unnur stígur á svið mun tónlistarkonurnar Dagný Halla, Marína Ósk og Fabúla leika eigin lög. Dagný Halla er að stíga sín fyrstu skref í bransanum, Marína Ósk er við nám í Hollandi, en Fabúla á að baki fjórar sólóplötur og hefur tvívegis verið tilnefnd til tónlistarverðlauna.
Vinsamlegast athugið
18 ára aldurstakmark er á viðburðinn.