Það verða sannkallaðir stórtónleikar í Silfurbergi fimmtudagskvöldið 3. júlí klukkan 21:00 þegar hljómsveitirnar Hjaltalín og Kaleó og tónlistarmaðurinn Snorri Helgason taka höndum saman og spila til stuðnings hjálparstarfi fyrir börn í Suður-Súdan.
UNICEF hefur lýst yfir hæsta stigi neyðar í Suður-Súdan og nýlega hófu samtökin á Íslandi neyðarsöfnun þar sem biðlað er til almennings og fyrirtækja að rétta börnum í Suður-Súdan hjálparhönd. Tónleikarnir eru liður í söfnuninni og mun hver einasta króna af miðasölu renna til UNICEF þökk sé stuðningi lyfjafyrirtækisins Alvogen sem stendur allan straum af kostnaði og sér auk þess um framkvæmd tónleikanna.
Með kaup á miða styrkir þú neyðarsöfnun UNICEF fyrir börn í Suður-Súdan en einnig er hægt að styrkja með því að senda sms-ið BARN í númerið 1900 (1900 krónur).