Sinfóníuhljómsveit Toronto
Sinfóníuhljómsveit Toronto borgar er án efa ein fremsta sinfóníuhljómsveit heims. Tónleikar hennar í Hörpu teljast því stórviðburður sem tónelskir áheyrendur ættu ekki að láta framhjá sér fara.
Hljómsveitin var stofnuð árið 1922 og er í dag meðal stærstu menningarstofnana Kanada. 300.000 gestir sækja tónleika hljómsveitarinnar á ári og 5 milljónir í viðbót hlýða á útvarpsútsendingar hennar. Hljómsveitin hefur ferðast um heim allan og leikið í sölum á borð við Carnegie Hall í New York og Musikverein í Vín. Heimasalur hljómsveitarinnar er Roy Thomson Hall í Toronto, þar sem flestir tónleikar hennar fara fram. Seiji Ozawa, Sir Andrew Davis og Jukka-Pekka Saraste eru meðal þeirra sem gegnt hafa stöðu aðalhljómsveitarstjóra Toronto hljómsveitarinnar. Í dag er aðalhljómsveitarstjóri hennar hinn kanadíski Peter Oundjian. Hann hefur stjórnað sveitinni frá árinu 2004 og heldur um tónsprotann á tónleikum hennar í Hörpu.