Selkórinn heldur tvenna tónleika í Norðurljósasal Hörpu sunnudaginn 18. maí kl. 17:00 og kl. 20:00
Flutt verður fjölbreytt tónlist eftir Gunnar Þórðarson tónskáld.
Selkórinn mun syngja helstu dægurlög Gunnars sem þjóðin hefur tekið ástfóstri við og eru löngu orðin sígild. Sjálfur leikur hann með kórnum ásamt hljómsveit.
Þóra Einarsdóttir sópran og Elmar Gilbertsson tenór flytja atriði úr óperunni Ragnheiður. Snorri Sigfús Birgisson tónskáld hefur útsett og leikur með á flygil.
Selkórinn var stofnaður á Seltjarnarnesi 1968 og hefur á ferli sínum sungið víða erlendis sem hérlendis. Viðfangsefni kórsins hafa verið fjölbreytt og af ýmsum toga bæði veraldleg og kirkjuleg. Fyrir tónleikana nú í Hörpu hefur Þórir Baldursson útsett fyrir Selkórinn lögin Þitt fyrsta bros og Vetrarsól. Einnig hefur Daníel Þorsteinsson tileinkað Selkórnum útsetningar sínar af lögunum Gamli bærinn minn og Við Reykjavíkurtjörn.
Oliver Kentish er stjórnandi Selkórsins.
Gunnar Þórðarson er litríkt tónskáld sem eftir liggur hundruð tónverka. Einkum eru það dægurlög á borð við Bláu augun þín sem hafa haldið nafni hans á lofti allt frá því hann gerði garðinn frægan með Hljómum frá Keflavík á sjöunda áratug nýliðinnar aldar. Nýjasta tónsmíð Gunnars óperan Ragnheiður hefur verið á fjölum Hörpu nú á vormánuðum við metaðsókn og fádæma lof áheyrenda. Íslensku Tónlistarverðlaunin 2013 völdu Gunnar Þórðarson tónhöfund ársins fyrir tónlistina í óperunni Ragnheiður. Einnig var uppsetning óperunnar í Skálholti valin Tónlistarviðburður ársins 2013.
Þóra Einarsdóttir stundaði söngnám við Söngskólann í Reykjavík og við Guildhall School of Music and Drama. Að námi loknu hefur hún sungið við helstu óperuhús Evrópu en einnig í Bandaríkjunum. Nú síðast söng Þóra við Íslensku óperuna í Hörpu þar sem hún söng titilhlutverkið í óperunni Ragnheiði.
Elmar Gilbertsson söng í rokkhljómsveit og í karlakór áður en hann lærði sönglist og útskrifaðist frá Söngskóla Sigurðar Demetz. Hann nam síðar við Tónlistarskólann í Amsterdam og Konunglega tónlistarháskólann í Haag. Að námi loknu hefur hann sungið víða í Evrópu. Elmar söng nú síðast hlutverk Daða í óperunni Ragnheiður í Hörpu.