Allt frá árinu 2008 hefur hljómsveitin Árstíðir lagt undir sig Fríkirkjuna í Reykjavík á kvöldi Þorláksmessu og haldið þar sérstaka hátíðartónleika. Rík hefð hefur myndast í kringum þennan viðburð þar sem sveitin leikur eigið efni í bland við hátíðleg lög sem eru sérstaklega útsett og æfð fyrir tilefnið. Árstíðir hafa einnig haft fyrir venju að fá til sín góða gesti á Þorláksmessu. Þetta árið munu tónlistarkonan Myrra Rós Þrastardóttir og klassíska söngkonan Karin Björg Torbjörnsdóttir leggja þeim lið.
Hljómsveitina Árstíðir þekkja flestir fyrir klassísk hljóðfæri og raddaðan söng, en segja má að í tónlist þeirra gæti áhrifa úr ýmsum ólíkum áttum. Síðustu árin hefur sveitin leitað í auknum mæli út fyrir landsteinana, ferðast um gjörvalla Evrópu og komið fram ýmsum gerðum tónleikastaða – allt frá vel sóttum tónlistarhátíðum til lestarstöðva. Árið sem er að líða hefur verið viðburðaríkt og hefur sveitin nýlokið við þriggja vikna tónleikaferð um Þýskaland og er á leið í þá næstu til Belgíu og Lúxemborgar í lok nóvember.
