Sunnudaginn 3. nóvember mun hljómsveitin Mógil halda tónleika vegna útgáfu á nýjasta hljóðdiski sínum Aðventu. Diskurinn kemur út hjá þýska útgáfufélaginu „Winter and Winter“ í haust. Tónleikarnir verða haldnir klukkan 17:00 í Gunnarshúsi, Dyngjuvegi 8 í Reykjavík. Tónlistin og textar á diskinum eru undir áhrifum frá hinni sígildu skáldsögu Aðventu eftir rithöfundinn Gunnar Gunnarsson (1889-1975). Orri Huginn Ágústsson leikari mun lesa upp valin texta úr bókinni á tónleikunum.
Tónlistin opnar heim fjárhirðisins Benedikts þar sem hann gengur aleinn uppi í fjalllendi Íslands á Aðventunni í leit að sauðfé, sem ekki hefur skilað sér við reglubundna smalamennsku. Í gegnum hana upplifir áheyrandinn stórkostlegt landslag, fimbulfrost og fárviðri en einnig góðmennsku, hlýju, kyrrð og ró ásamt mikilli einangrun og brostnum vonum.
Mógil skapar sinn eigin hljóðheim þar sem klassík, þjóðlagatónlist, djass og tilraunatónlist mætast á sérstakan hátt. Söngkona hljómsveitarinn er Heiða Árnadóttir, Joachim Badenhorst spilar á klarinett, Hilmar Jensson á gítar, Kristín Þóra Haraldsdóttir á violu og Eiríkur Orri Ólafsson á trompet.
Tónleikarnir eru styrktir af Reykjavíkurborg.