Sinfóníuhljómsveit Færeyja heimsækir Sinfóníuhljómsveit Norðurlands.
Sinfóníuhljómsveit Færeyja var stofnuð 1983 og fagnar því um þessar mundir 30 ára afmæli sínu. Hljómsveitin var stofnuð í kjölfar opnunar Norræna hússins í Færeyjum þar sem eru kjöraðstæður til tónleikahalds. Þar hélt hún sína fyrstu tónleika 19. júní 1983 og hefur átt miklum vinsældum að fagna æ síðan. Hljómsveitin heldur allt að 20 tónleikum á ári og er þekkt fyrir fjölbreytt og metnaðarfullt efnisval. Aðalhljómsveitarstjóri er Bernharður Wilkinson en hann hefur lagt sitt af mörkum til að skapa Sinfóníuhljómsveit Færeyja sérstöðu og glæsileika.
Í tilefni af stórafmæli sínu heimsækir Sinfóníuhljómsveit Færeyja Norðurland. Á efnisskránni er m.a.píanókonsert í flutningi hins rússneska Pavel Rajkerus og frumflutningur á verki eftir Sunleif Rasmussen sem er meðal áhrifamesta tónlistarfólks Færeyja. Verkið er afmælisgjöf hans til Sinfóníuhljómsveitar Færeyja og fagnaðarefni að Norðlendingar og aðrir gestir fái að njóta góðs af.
Pavel Rajkerus píanóleikari stundaði nám við Rimsky-Korsakov ríkistónlistarháskólann í St. Pétursborg sem er einn virtasti tónlistarháskóli Rússlands. Hann hefur verið sigusæll í ýmsum alþjóðlegum keppnum en hann vann t.d. árið 2000 alþjóðlega keppni í St. Pétursborg sem efnilegasti píanóleikarinn. Rajkerus hefur átt mjög farsælan feril og komið víða fram, m.a. í Rússlandi, Bandarikjunum og í Evrópu. Hann starfar einnig sem píanókennari í St. Pétursborg og í Kóreu en nemendur hans hafa þegar margir unnið til verðlauna innanlands og utan og þykja líklegir til frekari afreka.
Bernharður Wilkinson aðalstjórnandi Sinfóníuhljómsveitar Færeyja fæddist á Englandi og á farsælan tónlistarferil að baki. Hann hófst þegar Bernharður var ungur drengur og söng í drengjakór á Englandi og kom m.a. fram í Westminister Abbey. Hann lærði síðar á flautu og starfaði lengi sem flautuleikari hjá Sinfóníuhljómsveit Íslands eða þar til hann var ráðinn þar sem aðstoðarhljómsveitarstjóri. Bernharður hefur stjórnað ýmsum hljómsveitum og kórum víða um Evrópu. Hann hefur starfað sem aðalhljómsveitarstjóri Sinfóníuhljómsveitar Færeyja síðan árið 2005.
SN óskar Sinfóníuhljómsveit Færeyja innilega til hamingju með afmælið
Efnisskrá
Sunleif Rasmussen Veitsla
(1961)
Pjotr Tjækovskí Píanókonsert nr. 1
(1840-1893)
HLÉ
Edward Elgar Enigma tilbrigðin
(1857-1934)