Kammertónleikar Sinfóníuhljómsveitar Norðurlands.
Efnisskrá tónleikanna einkennist af samspili suðrænna og norrænna tóna. Flutt verður munúðarfullt verk eftir eitt af þekktustu gítartónskáldum 20. aldarinnar, hinn ítalska Mario Castelnuovo. Castelnuovo átti mjög farsælan feril sem kvikmyndatónskáld en hann samdi tónlist við ríflega 200 Hollywoodmyndir. Að auki verður sérlega spennandi frumflutningur á tónverki eftir hinn finnska Matta Saarinen. Matti leggur áherslu á grunntækni um leið og hann gefur sér frelsi til að fara út fyrir rammann og nálgast tónlistina með nýjum hætti í tónsmíðum sínum.
Matti Saarinen gítarleikari nam klassískan gítarleik í Svíþjóð í Tónlistarháskólanum í Malmö og við Síbelíusarakademíuna í Helsinki. Hann fór þaðan til Austurríkis og útskrifaðist frá Tón- og leiklistarháskólanum í Vín. Matti hefur komið fram sem einleikari og hljóðfæraleikari víða í Evrópu og Íslandi með ýmsum kammerhópum sem og SN. Hann flutti hingað til lands 2006 og starfar sem tónlistarkennari við Tónlistarskólann á Akureyri.
Zsuzsanna Bitay fiðluleikari. Að loknu diplomanámi í fiðluleik frá Tónlistarakademíunni í Cluj í Transylvaniu lék Zsuzsanna m.a. með Hljómsveit ungversku ríkisóperunnar, Ungversku útvarps- og sjónvarpshljómsveitinni og Hátíðarhljómsveitinni í Budapest. Zsuzsanna hefur búið á Íslandi frá 2007 og leikur reglulega með SN. Hún kennir við Tónlistarskóla Dalvíkurbyggðar og Tónskóla Fjallabyggðar.
Tomasz Kolosowski fiðluleikari lauk B.A. gráðu í fiðluleik frá Tónlistarakademíunni í Gdansk árið 2009 og meistaragráðu þaðan árið 2011. Tomasz hefur starfað með Fílharmóníusveitinni í Gdansk auk ýmissa tónlistarhópa bæði hér á landi og erlendis. Hann kemur reglulega fram með SN og kennir við Tónlistarskólann á Akureyri.
Pawel Kolosowski víóluleikari lærði á fiðlu við Tónlistarskólann á Akureyri. Árið 2006 lauk hann B.A. námi frá Tónlistarakademíunni í Gdansk í Póllandi og meistaragráðu frá sama skóla 2012. Pawel hefur starfað með Fílharmóníusveit Gdansk, Sinfóníuhljómsveit Gdansk, SN auk ýmissa tónlistarhópa bæði hér á landi og í Evrópu.
Ásdís Arnardóttir lauk meistarnámi í sellóleik frá Boston University árið 1995. Áður hafði hún m.a. stundað nám við Tónlistarskólann í Reykjavík og í Barcelona við Escuela Luthier d´Arts Musicals. Ásdís starfaði við Tónskóla Sigursveins D. Kristinssonar og Suzukitónlistarskólann í Reykjavík frá 1995-2007. Hún lék reglulega með Hljómsveit Íslensku óperunnar og var fastráðin við Sinfóníuhljómsveit Íslands 1997-2000. Auk þess hefur Ásdís alltaf lagt sig eftir að iðka kammertónlist. Ásdís starfar við tónlistarkennslu og sellóleik á Norðurlandi og er virkur þátttakandi í Barokksmiðju Hólastiftis og Sinfóníuhljómsveit Norðurlands.
Efnisskrá
Mario Castelnuovo-Tedesco Kvintett fyrir gítar og strengjakvartett, op.143
(1895-1968)
1. Allegro, vivo e schietto
2. Andante mesto
3. Scherzo. Allegro con spirito, alla Marcia
4. Finale. Allegro con fuoco
Hlé
Matti Saarinen Kvintett fyrir rafmagnsgítar og strengjakvartett
(1978)