Hljómsveitin Stafrænn Hákon hefur nú gefið út sína 9. breiðskífu. Af því tilefni mun sveitin efna til útgáfutónleika í Tjarnarbíó miðvikudaginn 23. mars kl. 21:00 og fagna útgáfu breiðskífunnar.
Gripurinn heitir Eternal Horse og kom út á geislaplötu á vegum bandarísku útgáfunnar Darla Records og er hún einnig fáanleg á helstu tónlistarveitum alnetsins s.s. Spotify, Tidal og iTunes.
Eternal Horse verður leikin í heild sinni af hljómsveitinni ásamt þaulreyndum og geðþekkum aðstoðarmönnum sem leika munu á strengja-, blásturs- og slagverkshljóðfæri.
Geislaplatan verður til sölu á staðnum. Þess má einnig geta að Eternal Horse verður til umfjöllunar á Rás 2 sem plata vikunnar dagana 14. – 18. mars.
Aðgangseyrir er 2.500 kr.