Vortónleikar Karlakórs Reykjavíkur eru framundan en þeir verða haldnir í Langholtskirkju dagana 27. 28. og 29. apríl kl. 20.00 og 2. maí kl. 15.00.
Sérstakur gestur á tónleikunum er hinn síungi kór eldri félaga Karlakórs Reykjavíkur en í ár er liðin hálf öld síðan Sigurður Þórðarson, stofnandi og fyrsti stjórnandi Karlakórs Reykjavíkur, setti á laggirnar þennan vettvang fyrir kórfélaga sem kjósa að fara sér hægar í söngstarfi án þess að hætta því alveg. Auk þess sem þeir koma fram sér, munu þeir sameinast aðalkórnum í nokkrum lögum.
Nokkrir kórfélagar munu syngja einsöng á tónleikunum auk þess sem Benedikt Gylfason drengjasópran kemur fram í einu lagi en þessi hæfileikaríki drengur hefur áður sungið með kórnum og jafnan vakið mikla hrifningu tónleikagesta. Anna Guðný Guðmundsdóttir leikur á flygilinn og Friðrik S. Kristinsson heldur um stjórnvölinn sem fyrr.
Á efnisskránni eru lög úr ýmsum áttum, norræn verk verða áberandi en einnig íslensk og þýsk, svo eitthvað sé upp talið.