Þegar sólin sigri nær
Kór Akraneskirkju í Norðurljósum
Flutt verður fjölbreytt efnisskrá sem inniheldur íslensk og ensk þjóðlög, trúarlega tónlist frá Svíþjóð og Englandi og sönglög úr smiðju Tómasar R. Einarssonar í kórútsetningum Gunnars Gunnarssonar.
Efnisskráin sýnir fjölbreytileika í verkefnavali kórsins sem ekki aðeins sinnir kórsöng við athafnir í Akraneskirkju, heldur er einnig mikilvægur hornsteinn í menningarlífi Skagamanna.
Ásamt kórnum koma fram þeir Gunnar Gunnarsson píanóleikari, Tómas R. Einarsson kontrabassaleikari, Ingi Björn Róbertsson trommuleikari, Birgir Þórisson píanóleikari, Kristín Sigurjónsdóttir fiðluleikari, Auður Guðjohnsen mezzosópran og Halldór Hallgrímsson tenór.
Stjórnandi Kórs Akraneskirkju er Sveinn Arnar Sæmundsson.
Kór Akraneskirkju er skipaður rúmlega 50 félögum á öllum aldri. Tónlistarlegur bakgrunnur kórfélaga er mismunandi en allir hafa það að markmiði að koma saman og gleðja aðra með söng. Með það að leiðarljósi eru margir vegir færir.