1.des n.k. verður íslenska lýðveldið sjötugt og af því tilefni ætlar Bjartmar Guðlaugsson, sem er aðeins yngri en lýðveldið, að halda nokkra tónleika þar sem hann rýnir í þessi 70 ár og skoðar lífið sitt í samhengi við þau á sinn sérstaka og skemmtilega hátt. Textarnir hans fjalla að miklu leyti um persónulega reynslu hans og upplifun. Á tónleikunum segir hann sögurnar á bak við texta laganna sem hann flytur í tímaröð í gegnum lýðveldissöguna.
Hann röltir m.a. um ímyndað þorp þar sem skrautlegar persónur búa, t.d. þeir Sumarliði og Fúll á móti. Tónleikagestir fá m.a. að kynnast fleirum úr fjölskyldum þeirra, persónum sem hafa dúkkað upp í textum Bjartmars, án þess að fólk hafi áttað sig á tengslum þeirra við þessa merku menn. Svo er aldrei að vita nema hann skimi inn í framtíðina og kynni ný lög af væntanlegri plötu.
Tónleikarnir standa í tvær klukkustundir með einu 15 mínútna hléi. Þetta er skemmtun eins og hún gerist best hjá Bjartmari, gömlu góðu lögin, frábærir textar og yndisleg sögustund.