Hulda Jónsdóttir, fædd árið 1991, hóf fiðlunám fjögurra ára gömul hjá Sigríði Helgu Þorsteinsdóttur við Tónskóla Sigursveins D. Kristinssonar. Síðar nam hún við Tónlistarskólann í Reykjavík hjá Lilju Hjaltadóttur og Guðnýju Guðmundsdóttur. Vorið 2009 lauk hún diplómaprófi frá Listaháskóla Íslands og hefur frá hausti þess árs stundað nám við The Juilliard School í New York þar sem kennari hennar er David Chan. Fyrrum kennarar hennar við Juilliard eru Robert og Nicholas Mann.
Hulda hefur komið fram sem einleikari og með öðrum við ýmis tækifæri á Íslandi sem og í Noregi, Sviss, Bandaríkjunum og Mexíkó. Hún hefur einnig leikið einleik með ýmsum hljómsveitum, m.a. tvívegis með Sinfóníuhljómsveit Íslands.
Frá hausti 2006 hefur Hulda verið þess heiðurs aðnjótandi að leika á fiðlu smíðaða af Vincenzo Sannino í kringum 1920 og boga smíðuðum af Victor Fetique. Hvoru tveggja hefur hún að láni frá Rachel Elizabeth Barton Foundation í Chicago og hefur einnig hlotið afreksstyrk frá stofnuninni.
Í sumar kom Hulda fram á Podium Festival hátíðinni á Stokkalæk og var einnig nýverið veittur menningarstyrkur American Scandinavian Society í New York. Í júlí og ágúst tók hún þátt í Pacific Music Festival í borginni Sapporo í Japan. Hátíðin var stofnuð árið 1990 af Leonard Bernstein og er að mestu hugsuð sem hljómsveitarnámskeið og fékk Hulda tækifæri til þess að genga leiðarastöðu innan hljómsveitarinnar. Hátíðin er mjög eftirsótt og þar fá nemendur tækifæri til þess að spila með kennurum námskeiðsins bæði á hljómsveitinni og í kammertónlist, en þeir eru allir leiðarar í helstu sinfóníuhljómsveitum heims. Má þar nefna Berliner Philharmoniker, Metropolitan Opera Orchestra, Cleveland Symphony Orchestra og Staatskapelle Dresden. Í ár endaði hátíðin á stuttri tónleikaferð til Kína þar sem borgirnar Shenyang og Peking voru heimsóttar.