Einn þekktasti rokkgítarleikari sögunnar, Jeff Beck, heldur tónleika í Vodafonehöllinni 27. júní næstkomandi. Þetta er í fyrsta sinn sem þessi heimsþekkta gítargoðsögn spilar á Íslandi, og er sannkallaður hvalreki fyrir tónlistaráhugafólk.
Tónleikarnir eru hluti herferðar Endgame, samtaka sem helga sig baráttu gegn útbreiðslu AIDS, malaríu og berkla í heiminum.
Beck er enskur, fæddur 1944 og hefur m.a. leikið með The Yardbirds og heimskunnum tónlistarmönnum á borð við Mick Jagger, Tinu Turner og Stevie Wonder. Í úttekt tímaritsins Rolling Stone árið 2011 yfir bestu gítarleikara allra tíma varð Beck í fimmta sæti og sagður einn áhrifamesti gítarleikari rokksögunnar. Hann hefur sjö sinnum hlotið Grammy-verðlaun fyrir gítarleik sinn og í tvígang verið tekinn inn í Frægðarhöll rokksins, Rock and Roll Hall of Fame, annars vegar sem liðsmaður The Yardbirds og hins vegar sem sólólistamaður.
Jeff kemur hingað ásamt hljómsveit sinni sem er skipuð einvala liði hljóðfæraleikara. Meðal þeirra sem leika með Beck í Vodafonehöllinni er Rhonda Smith, bassaleikari Prince.