Stebbi & Eyfi í Hlégarði.
Stefán Hilmarsson og Eyjólfur Kristjánsson hafa átt langt samstarf. Það teygir sig aftur til árisins 1991, en þá héldu þeir félagar til Ítalíu ásamt föruneyti og tóku fyrir Íslands hönd þátt í Söngvakeppni Evrópskra sjónvarpsstöðva. Þar sungu þeir lagið um Nínu, sem þeir hafa sungið oft síðan. Stefán og Eyjólfur hafa haldið þræðinum þau ár sem liðin eru frá Ítalíuförinni, komið annað slagið saman og skemmt víða um land sem og erlendis. Þeir hafa þó í gegnum árin einnig verið uppteknir á öðrum vígstöðvum, Stefán m.a. með Sálinni auk þess að hafa gert nokkrar sólóplötur og Eyjólfur einn síns liðs og með ýmsum sveitum. Það leið allnokkur tími frá fæðingu Nínu uns þeir sendu frá sér sína fyrstu sameiginlegu plötu árið 2006, en sú ber heitið "Nokkrar notalegar ábreiður" kom út. Árið 2011 sendu þeir svo frá sér plötuna “Fleiri notalegar ábreiður”. Þeir félagar munu flytja lög af þessum plötum, í bland við þekkt lög sem þeir hafa hljóðritað og flutt í sitthvoru lagi í gegnum árin.
Sjáumst í túninu heima, góða skemmtun.