Verið velkomin á tónleikaröðina Alþjóðlegt orgelsumar Hallgrímskirkju 2017. Í 25.sinn verður sumarið í Hallgrímskirkju fyllt af orgelómum. Í ár koma fram afburða konsertorganistar í fremstu röð frá ýmsum löndum. Fimmtudaginn 13.júlí kl.12.00-12.30 mun Ágúst Ingi Ágústsson organisti flytja frábæra tónlist eftir M. Duruflé og J. Alain á stórfenglega Klais orgel Hallgrímskirkju.
Ágúst Ingi Ágústsson er fæddur og uppalinn í Reykjavík. Hann lauk kantorsprófi og 8. stigi í orgelleik frá Tónskóla þjóðkirkjunnar árið 1998. Veturinn 2000-2001 sótti hann tíma í orgelleik hjá prófessor Hans-Ola Ericsson í Piteå í Svíþjóð. Vorið 2008 lauk Ágúst einleiksáfanga frá Tónskóla þjóðkirkjunnar með hæstu einkunn undir handleiðslu Harðar Áskelssonar en að auki naut Ágúst leiðsagnar Eyþórs Inga Jónssonar og Björns Steinars Sólbergssonar. Ágúst hefur enn fremur sótt meistaranámskeið í orgelleik hjá þekktum organistum á borð við Mattias Wager og Christopher Herrick.
Ágúst starfaði sem organisti við St. Jósefskirkju í Hafnarfirði 1993–2000 og veturinn 1999-2000 starfaði hann sem aðstoðarorganisti við Hallgrímskirkju í Reykjavík. Hann hefur haldið einleikstónleika á Íslandi og í Danmörku.
Haustið 1998 hóf Ágúst nám við Læknadeild Háskóla Íslands og útskrifaðist þaðan 2004. Hann hefur stundað læknisstörf síðan og starfar nú sem yfirlæknir við sjúkrahúsið í Horsens í Danmörku.
13. JÚLÍ 2017 KL. 12.00-12.30
ÁGÚST INGI ÁGÚSTSSON
HORSENS, DANMÖRKU
TÓNLIST EFTIR: M. DURUFLÉ OG J. ALAIN
Maurice Duruflé 1902–1986
Prélude sur l‘IntroÏt de l‘Épiphanie, op. 13, 1961
Jehan Alain 1911–1940
Variations sur Lucis Creator, JA 027, 1932
Maurice Duruflé EGATOP
Prélude, adagio et choral varaiésur le thème de Veni Creator op. 4, 1930