Stutt lýsing: Á Alþjóðlegu orgelsumri 2017, sem nú er haldið 25. sumarið í röð koma fram afburða konsertorganistar í fremstu röð frá ýmsum löndum. Fimmtudaginn 6.júlí kl.12.00-12.30 mun Kitty Kovacs, organisti í Landakirkju í Vestmannaeyjum flytja Passacaglíu og fúgu í c-moll eftir sjálfan J.S. Bach og einnig mjög spennandi verk eftir Zsolt Gárdonyi. Kitty mun flytja bæði verkin á stórfenglega Klais orgel Hallgrímskirkju, en það er stærsta hljóðfæri landsins.
6. júlí kl. 12.00:
Kitty Kovacs, Landakirkju í Vestmannaeyjum
EfnisskráJohann Sebastian Bach 1685–1750
Passacaglia og fúga í c-moll, BWV 582
Zsolt Gárdonyi *1946 EGATOP
Hommage à Erroll Garner + Art Tatum + Oscar Peterson
Grand Cheur
Kitty Kovács er fædd í Gyor í Ungverjalandi árið 1980 og útskrifaðist árið 2003 frá tónlistardeild Széchenyi István háskólans þar í borg með diplómu í píanó- og kammertónlist. Eftir útskriftina starfaði hún sem undirleikari í Gyor og lagði síðan stund á undirleikaranám við Ferenc Liszt Akademíuna í Budapest. Á námsárum sínum vann hún í píanókeppnum, m.a. árið 1997 í Salt Lake City og árið 2000 varð hún í 3. sæti í Chopin keppninni.
Kitty kom til Íslands árið 2006 og hefur starfað sem píanókennari og organisti, frá árinu 2011 hefur hún verið kirkjuorganisti við Landakirkju í Vestmannaeyjum og kennari við Tónlistarskóla Vestmannaeyja.
Undanfarin 4 ár hefur Kitty stundað orgelnám við Tónskóla þjóðkirkjunnar og nú í vor lauk hún kantorsnámi þaðan. Kennari hennar þar er Lenka Mátéová.