Ström og Wasser - Tónleikar

Nú er komið að því að Strom & Wasser fari um austur og norðurhéruð Íslands. Sveitin hefur nú nýverið farið um Þýskaland og lék m.a. á Hafnarhátíðinni í Flensborg fyrir rétt tveimur vikum og á hinu þekkta Wutsrock - festivali í Hamborg, sem haldið var að þessu sinni í 38 sinn. Strom & Wasser byrjar för sína á Seyðisfirði og heldur svo áfram norður eftir. Í bandinu eru úrvals-hljóðfæraleikarar þýskir, auk forsprakkans HEINZ RATZ, en að auki syngja með sveitinni Ragnheiður Gröndal og Egill ólafsson, þá blæs Haukur Gröndal í klarinett og saxafón. 

Á öllum stöðunum mun Heinz Ratz, halda samdægurs fyrirlestur sem hann kallar; Hin nýja ásýnd Evrópu - fyrirlesturinn er öllum opinn og aðgangur ókeypis. Á Akureyri verður hann með fyrirlestur í Háskólanum á Akureyri, Egill Ólafsson mun og segja af kynnum sínum af Herra Ratz og segja af helstu afrekum hans og sérstöðu í þýsku samfélagi. 

Heinz er baráttumaður fyrir auknum mannréttindum og lífsrými fyrir þá sem eru án griðlands, nýverið hefur háskólasamfélagið þýska heiðrað framlag hans í þágu flóttamanna, sem hann hefur virkjað með músíkþátttöku og með því ljáð þeim rödd í þýsku samfélagi. Í fyrstu var þetta í óþökk stjórnarinnar en nú hafa augu hennar opnast fyrir jákvæðu framlagi HEINZ RATZ og stjórnvöld hafa boðist til að ganga til liðs og styðja verkefnið.

Músík Strom & Wasser er skemmtileg blanda af kabarett/rapp/funk/folk þar sem tónlistararfur Evrópu er skoðaður - kirkjutóntegundir, tataraskalar, dýraköll, tónlist austur-kirkjunnar, balkanskir dansar, Fato og áfram mætti telja. Sungið er á gelísku/ísl/þýsku og ensku. Reykjavík - Project, heitir þetta framlag Strom & Wasser og Egill og Ragnheiður eru meðhöfundar tónlistar og texta. 

Nýverið kom út tveggja platna albúm Sveitarinnar sem verður til sölu á tónleikunum gegn vægu verði. Útgáfan er ein af tíu væntanlegum á vegum S&W sem hið virta útgáfufélag í Traumton í Berlín gefur út. Tónleikarnir hefjast kl.21 á Græna Hattinum og er aðgangseyrir kr. 3500 en kr.3000 í forsölu.