Föstudagur 22. júlíkl. 20
„Árstíðir”
Opnunartónleikar Reykholtshátíðar
Reykholtskórinn
Árstíðirnar eftir Vivaldi
Reykholtskórinn undir stjórn Viðars Guðmundssonar mun hefja 20. Reykholtshátíðina. Kórinn, sem er samstarfsverkefni Hvanneyrar-, Reykholts-, og Stafholtsprestakalla, mun flytja bæði íslensk og erlend lög en sérstakur gestur kórsins verður Elmar Gilbertsson tenór. Einnig munu hljóðfæraleikarar Reykholtshátíðar taka þátt í flutningi nokkra laga. Eftir hlé verður haldið á suðrænar slóðir með heildarflutningi á hinu ástsæla verki Árstíðunum eftir Vivaldi. Einleikshlutverkið verður í höndum Ara Þórs Vilhjálmssonar fiðluleikara, en hann er gestum Reykholtshátíðar af góðu kunnur, en hann starfar nú sem leiðari 2. fiðlu í Fílharmóníusveit Helsinki.
Laugardagur 23. júlíkl. 16
„Bach-Mozart-Boccherini”
Kammertónleikar
Ljúfir tónar hljóma á þessum síðdegistónleikum Reykholtshátíðar. Sigurgeir Agnarson mun hefja leik á hinni björtu og fallegu sellósvítu nr. 1 í G-dúr eftir J.S. Bach. Næst á dagskrá er Mozart flautukvartettinn í D-dúr með sínum undurfagra hæga kafla. Capriccio fyrir 3 fiðlur eftir þýska fiðluleikarann og tónskáldið Friedric Hermann er lítil gletta með hægum inngangi þar sem tónskáldið leikur sér með þessa frekar óvanalegu hljóðfærasamsetningu. Tónleikunum lýkur á strengjakvintett í f-moll eftir hið ítalsk ættaða tónskáld og sellósnilling Boccherini. Boccherini samdi fjölda verka, en mörg þeirra eru sjaldan flutt í dag, m.a. þessi gullfallegi strengjakvintett í f-moll.
Laugardagur 23. júlíkl. 20
„Ástir á köldum klaka”
Elmar Gilbertsson, tenór
Helga Bryndís Magnúsdóttir, píanó
Stórtenórinn Elmar Gilbertsson og píanóleikarinn Helga Bryndís Magnúsdóttir taka höndum saman á þessum tónleikum. Fyrir hlé flytja þau lagaflokkinn Ástir skáldsins (Dichterliebe) eftir Robert Schumann. Þessi lagaflokkur er einn af hápunktum í sönglagagerð rómantíska tímabilsins í tónlistarsögunni en hann samanstendur af sextán sönglögum við texta eftir Heinrich Heine.
Eftir hlé verður sjónum beint að klakanum í norðri með flutningi á úrvali laga úr Heimskringlu eftir Tryggva M. Baldvinsson við texta Þórarins Eldjárns í úsetningu fyrir salon hljómsveit. Að lokum verða fluttar útsetningar Þórðar Magnússonar á vel þekktum íslenskum dægurlögum fyrir píanótríó og söngrödd.
Sunnudagur 24. júlí kl. 16
„Himneskur Schubert”
Lokatónleikar Reykholtshátíðar
Tveir af meisturum klassíska tímabilsins verða í sviðsljósinu á lokatónleikum Reykholtshátíðar ásamt frumflutningi á glænýju verki eftir Gunnar Andreas Kristinsson. Strengjatríó Beethovens eru gullmolar sem vert er að heyra, sérstaklega hið ástríðufulla tríó í c-moll op. 9. Reykholtshátíð heldur áfram að panta ný verk til að frumflytja á hátíðinni. Að þessu sinni verður leikið nýtt verk eftir Gunnar Andreas Kristinsson, en verkið kallast úr Grímnismálum og er skrifað fyrir píanókvintett og söngrödd. Drottning kammerverka Schuberts slær svo botninn í Reykholtshátíð, eða hinn himneskt fallegi selló kvintett í C-dúr.