Hljómsveitin NOISE gefur út plötuna “Echoes” þann 15.apríl næstkomandi. Echoes er fjórða breiðskífa NOISE en platan var tekin upp, hljóðblönduð og masteruð í stúdíóinu Hljóðverk á tímabilinu 2015-2016. Hljóðheimur plötunnar er órafmagnaður og fékk hljómsveitin strengjasveit Mark Lanegan til liðs við sig í nokkrum lögum.
NOISE fagna útgáfu plötunnar með útgáfutónleikum á Græna Hattinum, föstudaginn 20.maí. Hljómsveitin mun spila plötuna í heild sinni á tónleikunum en þar verður einnig hægt að kaupa Echoes á sérstöku tilboði.
Hljómsveitina NOISE ættu flestir að þekkja en bandið hefur verið starfandi frá árinu 2001 og hafa þeir gefið út þrjár plötur, átt fjölda laga á vinsældarlistum hérlendis sem og erlendis. Árið 2013 vann hljómsveitin t.a.m til verðlauna fyrir lag sitt “A Stab In The Dark” í bandarísku tónlistarverðlaununum Sunset Island Music Awards, en þar var umrætt lag valið lag ársins. Undanfarin misseri hefur hljómsveitin byggt upp sitt eigið hljóðver og unnið að gerð nýrrar tónlistar sem lítur nú dagsins ljós.