Leppalúðar og Létt jólatónlist er stórskemmtilegt jólaskemmtikvöld þar sem þjóðþekktir grínistar og tónlistarmenn láta móðinn mása í tali og tónum. Um er að ræða hina einu sönnu Hvanndalsbræður sem hafa aldrei verði jólalegri og sjaldan skemmtilegri, ber svo að nefna Sólmund Hólm grínista, útvarpsstjörnu og eftirhermu og síðast en ekki síst hið víðförla kyntákn landsbyggðarinnar Gísla Einarsson. Bræðurnir frá Hvanndal munu flytja nokkur af sínum þekktari jólalögum í bland við annað efni og fjölmiðlafríkin Sólmundur og Gísli munu reita af sér brandara eins og fiður af nýskotinni gæs og ólíklegt er að Rögnvaldur Gáfaði geti þagað heila kvöldstund. Ekki er ósennilegt að hópurinn muni svo blandast saman í eitt stórt jólabrandaraband þegar líður á kvöldið. Stórskemmtileg skemmtun fyrir alla á Græna Hattinum laugardagskvöldið 5. desember.
Vinsamlegast athugið
18 ára aldurstakmark er á viðburðinn.
