Slétt og brugðið Margrét J. Pálmadóttir tónlistarkona stendur fyrir tvennum tónleikum í Norðurljósasal Hörpu á Sumardaginn fyrsta miðvikudaginn 23.apríl n.k..
Fyrri tónleikarnir Óskasteinar hefjast kl. 14 og eru 20 ára afmælistónleikar Stúlknakórs Reykjavíkur þar sem eitthundrað stúlkur á aldrinum fjögurra ára til tuttuguogfimm ára flytja þekkt kórlög af hjartans list. Með Stúlknakórnum verða hljóðfæraleikararnir Antonia Hevesi píanóleikari, Matthías Stefánsson fiðluleikari og Viktoria Tsvetaeva sellóleikari. Margar uppvaxnar stúlkur Stúlknakórs Reykjavíkur eru orðnar atvinnutónlistarkonur og syngja og stjórna á tónleikunum. Auk Margrétar eru stjórnendur þær; Guðrún Árný Guðmundsdóttir, Hildigunnur Einarsdóttir og Sigríður Soffía Hafliðadóttir.
Tónleikarnir Konur í hundrað ár hefjast kl. 17 og eru af tilefni 100 ára afmælis kosningarréttar kvenna á Íslandi. Þar verður í máli og myndum flutt tilfinningarík dagskrá þekktra íslenskra kórlaga. Að flutningnum standa allir kvennakórar sem starfa í sönghúsinu Domus Vox og alls skipaðir 150 konum á öllum aldri; Vox feminae, Hrynjandi, Cantabile og Aurora. Með kórunum verða einnig listamenn í fremstu röð; Sigrún Hjálmtýsdóttir sópran, Maríus Sverrisson baríton og kórstjórnandi, Arnhildur Valgarðsdóttir píanóleikari og Matthías Stefánsson fiðluleikari.