Höfuðtónskáld og frumkvöðlar
Stór hljómsveitarverk eftirtektarverðra tónskálda; baráttukvenna og brautryðjenda verða í brennidepli þegar aldarafmælis kosningaréttar íslenskra kvenna verður minnst á sögulegum tónleikum Sinfóníuhljómsveitar Íslands. Jórunn Viðar, eitt af höfuðtónskáldum 20. aldar- innar á Íslandi, Ethel Smyth sem var betur þekkt sem pólitískur aðgerðasinni og kvenréttindakona, þrátt fyrir ótvíræða tónlistarhæfileika, og Amy Beach sem var fyrsta bandaríska kventónskáldið sem átti miklum vinsældum að fagna heima fyrir og í Evrópu; þessar listakonur ruddu brautina fyrir komandi kynslóðir tónsmiða.
Anna Þorvaldsdóttir er í fremstu röð yngri tónskálda en hún hlaut meðal annars Tónlistarverðlaun Norðurlanda- ráðs fyrir verk sitt Dreymi. Einleikari á tónleikunum er Ástríður Alda Sigurðardóttir píanóleikari og stjórnandi er aðal- hljómsveitarstjóri Sinfóníuhljómsveitarinnar í Rio de Janeiro, Ligia Amadio sem hefur stjórnað þekktum hljómsveitum í Ameríku, Asíu og Evrópu og hlotið margvíslegar viðurkenningar fyrir störf sín.
Tónleikarnir eru hluti af dagskrá sem haldin er í tilefni af 100 ára afmæli kosningaréttar kvenna á Íslandi.