Að kvöldi Þorláksmessu mun hljómsveitin Árstíðir halda sínu árlegu hátíðartónleika í Fríkirkjunni í Reykjavík. Skemmtileg hefð hefur skapast fyrir þessum tónleikum sem voru haldnir í fyrsta sinn árið 2008. Þeir hafa síðan þá verið haldnir á hverju ári og hefur þar jafnan myndast mikil hátíðarstemning. Að venju verða leikin frumsamin lög Árstíða í bland við valið jóla og hátíðarefni.
Hljómsveitin Árstíðir hefur á undanförnum árum getið sér gott orð fyrir vandaðan hljóðfæraleik og raddaðan söng. Sveitin hefur verið iðin við kolann á árinu og eyddi m.a. sumrinu sem leið í upptökur á þriðju breiðskífu sinni. Platan hefur fengið nafnið "Hvel" og eru fyrstu lög plötunnar þegar komin út á rafrænu formi.