Laugardaginn 24. Janúar næstkomandi munu margir af okkar ástsælustu listamönnum flytja úrval af bestu dægurperlum Eyjanna í Elborgarsal Hörpu.
Undanfarin ár hafa Eyjamenn og þeirra hollustu vinir komið saman í Eldborgarsal Hörpu í sannkallaðri tónlistarveislu og að auki notið þess að hitta gamla ættingja og vini, fólk sem það hefur ekki séð í áraraðir.
Laugardagskvöldið 24. janúar næstkomandi bjóðum við til enn einnar veislunnar. Í þetta skiptið er reyndar ekkert eitt þema, við einfaldlega bjóðum gestum upp á allar bestu dægurlagaperlurnar sem við kennum við Eyjar.
Flytjendurnir eru heldur ekki af verri endanum; Björgvin Halldórsson, Páll Óskar, Sigríður Beinteinstóttir, Bjartmar Guðlaugsson, Sverrir Bergmann, Hreimur Örn, Kristján Gísla, Silja Elsabet, Sunna Guðlaugs, Alexander Jarl og Óskar Einarsson ásamt meðlimum úr Gospelkór Reykjavíkur og söngkonunum Ölmu Rut og Ernu Hrönn.
Hljómsveitina, sem Þorvaldur Bjarni Þorvaldsson stýrir, skipa þeir Eiður Arnarsson á bassa, Birgir Nielsen á trommur, Jón Elfar Hafsteinsson á gítar, Kjartan Valdemarsson á hljómborð og harmonikku, Sigurður Flosason á saxafón, flautur og slagverk og Kjartan Hákonarson á trompet.
Ekki má heldur gleyma tveimur rúsínum í pylsuendanum, þ.e. Lúðrasveit Vestmannaeyja undir stjórn Jarls Sigurgeirssonar og hljómsveitinni Logum, sem mun án efa ylja mörgum gömlum Eyjamönnum um hjartaræturnar.